Чуден објект поминал покрај сонцето – Астрономите не виделе вакво нешто досега

asteroid-1-520x347.jpg

Астрономите од целиот свет се фрлија на проучување на вселенски објект каков до сега немале прилика да видат – астероид или комета која стигнала од друга ѕвезда.

Астрономот Роб Верик работел на податоци што се собрани со телескопот од Универзитетот на Хаваи, па забележал чуден објект во движење и го пријавил во „Мајнор планет центар“, каде што се составуваат извештаи за мали планети, месечини, природни сателити и комети. Телескопот служи како помошна алатка на НАСА за да лоцира објекти кои се движат блиску до Земјата, како астероиди. Досега сите вакви забележани објекти биле од нашиот Сончев Систем. Но овој пат ситуацијата била поинаква.

Објектот се движел екстремно брзо и имал траекторија според која може да се каже дека  го напушта нашиот Сончев Систем и нема да се врати. Објектот го нарекле „A/2017 U1“, кој е долг помалку од 400 метри, а кога влегувал во Сончевиот Систем се забрзувал со голема брзина. Сметале дека е комета, но објектот немал опашка како кометите. Астрономите пресметале дека поминал најблиску до Сонцето на 9 септември, поминувајќи во орбитата на Меркур.

Гравитацијата на Сонцето ги променила неговата насока и брзина, испраќајќи го надвор од нашиот Сончев Систем кон констелацијата Пегасус. Најблиску до Земјата објектот бил на 14 октомври, на оддалеченост од 15 милиони милји. Тоа е помалку од половина од растојанието помеѓу Земјата и Марс. Бидејќи објектот заминува брзо, астрономите немаат многу шанси да извршат детални набљудувања, но сепак има можност телескопот „Хабл“ да забележи некои негови карактеристики додека заминува. Според досега познатото, утврдено е дека објектот не е комета и има црвеникава боја.

Во извештај од 2016 година астрономите предвиделе дека интерстеларен објект може да се смета за објект блиску до Земјата врз основа на начинот на кој се движи. Сега откако објектот беше забележан, тие се обидуваат да детектираат други вакви мистериозни објекти. Ексцентричното движење на објектот кажува дека најверојатно долетал од друг далечен соларен систем, сметаат астрономите.

Со ваквите случаи ќе може подобро да се разбере зошто ваквите објекти лутаат во галаксијата, па и навлегуваат во нашиот Сончев Систем. За тоа утврдување многу ќе помогнат и модерните, големи телескопи што се развиваат и во иднина ќе служат како основни алатки за вакви набљудувања.

Што мислиш ти?
  • Ви се допаѓа оваа вест? Препорачајте ја на Вашите пријателите преку следниве сервиси:
  • Mail
Top