D3982F20-64D9-468D-9B79-3D5BCE109B61_cx0_cy1_cw0_w1023_r1_s.jpg

По минатогодишниот успех со „Силјан Штркот шанца“ на Срѓан Јаничиевиќ, Македонскиот народен театар со нова претстава за деца. На 22 март, на Големата сцена, премиерно ќе биде изведена „Авантурите на Аладин“ во адаптација, драматизација и режија на Бојан Трифуновски, претставата за којашто се вели дека „ја слави љубовта и е авантура на повеќе нивоа“.

Режисерот Бојан Трифуновски во 2014 година, во Театар за деца и младинци, го стори својот „Пат околу светот“ според Жил Верн. Две години подоцна еве го со адаптација, драматизација и режија на безвремената бајка „Авантурите на Аладин“. Овојпат за првпат во својата „матична куќа“. На Големата сцена на Македонскиот народен театар и со сите техничко-технолошки ресурси со кои располага нашата национална установа. И, најважно од сè со идеја една исклучително позната материја, многупати раскажаната приказна, да ја стори повторно интересна. Заедно со актерите ( неговата „фамилија“) да и даде нешто ново, да ја предизвика љубопитноста на децата и на сите оние што се чувствуваат така. Да им нацрта насмевки на лицата и да ја разбуди смеата во гледалиштето.

„Успеавме да го нагласиме хуморот во претставата затоа што ако нешто ми е омилено тоа е звукот на колективното смеење на децата. Едноставно нема поубав звук од тоа за мене на планетата земја. А, она што исто така беше интересно е тоа што пробавме за првпат на големата сцена на МНТ, првпат во принцип, да направиме претстава за деца којашто ги има сите визуелни бенефити“, вели Трифуновски.

Режисерот дополнува дека исклучително важно и тоа што претставата ќе изобилува со многу музика, која во случајов како автор ја потпишува мултиинструменталистот, диригент и композитор Џијан Емин.

„Оваа претстава ќе изобилува со многу музика. Музиката биде и автентична и описна, со одлични изоркестрирани композиции, но ќе има и неколку кавери на светски класици коишто помагаат да се осовремени приказната. Сакавме да креираме едно ведро и брзо темпо со кое се надеваме дека ќе го задржиме вниманието, не само на најмладите, туку и на останатата публика“, потенцира тој.

Сашко Коцев во улога на Абаназер Велики.

Сашко Коцев во улога на Абаназер Велики.

А, по Силјан Штркот, Александар Михајловски ја имал и задачата да го отелотвори и ликот на Аладин. Тој, нималку не крие дека како актер има убаво чувство кога игра во претстави за деца бидејќи, како што вели, тие се најискрени во реакциите.

„Познато ми е тоа чувство и еве сега тоа прераснува во нешто поголемо бидејќи одиме на поголема сцена. Многу повеќе деца ќе можат да доаѓаат на оваа претстава и да се забавуваат. Јас искрено уживам во овој проект и се надевам дека и понатаму ќе имаме плодна соработка и ќе правиме се подобри и поубави претстави за деца.“

Негова љубов во „Авантурите на Аладин“ е Дарја Ризова, која го толкува ликот на Принцезата Јасмин. Таа нагласува дека за неа ова е прекрасна и безвременска бајка која е обоена со љубов што ги урива сите препреки и победува.

„На децата и на возрасните им носиме порака дека љубовта е таа што го движи светот и нашето постоење. Во времево во коешто живееме треба да ја бараме љубовта во секого затоа што таа постои, но треба да се вреднува и да се шири меѓу нас.“

А, по цели 12 години откако во Кумановскиот театар имал улога во еден ваков зафат, во детска претстава еве го повторно и актерот Сашко Коцев. Тој, сега веќе како „средовечен“, во проектот на Трифуновски успеал да го „грабне“ ликот на Абаназер Велики. Говорјќи за процесот на подготовка на претставата, но и за концептот на МНТ да се бави со децата, потсетува дека тоа е значаен зафат оти на тој начин тие силно ќе влијаат на воспитувањето на најмладите да посетуваат театар.

Александар Михајловски како Аладин и Дарја Ризова го толкува ликот на Принцезата Јасмин.

Александар Михајловски како Аладин и Дарја Ризова го толкува ликот на Принцезата Јасмин.

„Во оваа претстава проблемите со коишто се соочувавме низ процесот беа тоа што е смешно како и колку да биде смешно. На кој начин тоа да го направиме затоа што претстава за деца не сме играле одамна. И тоа е малку друга дисциплина, друго ниво. Тоа што треба да биде тажно, како да го направиме да биде тажно. Како тоа да допре до нив. Тоа што треба да биде емотивно, како да допре до нив. Тоа беа некои работи коишто си ги повторивме и најубаво од се* беше она што е најубаво за актерот. Дека тој е едно дете коешто си игра. Се вративме да бидеме деца коишто си играат“, вели Коцев.

Инаку, во „Авантурите на Аладин“, во претставата со „лебдечки килими и многу љубовна магија“, настапуваат и Никола Ацевски (Духот од ламбата), Камка Тоциновски (Вдовицата – мајката на Аладин), Славиша Кајевски (Императорот – таткото на Јасмин), Драгана Левенска (Робинката од прстенот – Леонора) и Ненад Анѓелковиќ (Страшилото – принцот Леополд). Покрај нив учествуваат и децата-членови од Детското драмско студио на Магдалена Ризова-Черних.

За сценографијата била задолжена Илина Ангеловска, костимите се дело на Антонија Гугинска-Јорданоска и Елена Вангеловска, а кореографка е Александра Кочовска-Начева.

Репризата на „Авантурите на Аладин“, „првиот спектакл на МНТ за деца“ како што велат потписниците, е закажана за 29 март, во 19 часот.

Што мислиш ти?
  • Ви се допаѓа оваа вест? Препорачајте ја на Вашите пријателите преку следниве сервиси:
  • Mail